Новости

В храмах г.Сумы возносится сугубая молитва о возвращении Корсунского образа Пресвятой Богородицы

  На сугубой ектении:

     Еще молимся  о нечестивых людех, иже пакости содеяша людем православным и страшное святотатство учиниша и беззаконно похитиша чудотворную икону Корсунскую Шпилевскую и о еже  вразумити и наставити  их на путь покаяния  и да возвратится чудный образ  Богоматерний, молим Ти ся, Милосердный Господи, прости нас, услыши и помилуй.


МОЛИТВА

     Господи Сил, скорбящих радосте,  плачущих утешение и всех в малодушии сущих заступление сый! Призри милостивным оком Твоим на люте страждущий град Сумский, в немже за беззакония наша нестроения и раздоры зело умножишася. Еще же и люди нечестивии страшное святотатство содеяша и чудотворную Корсунскую икону, покровительницу нашу, беззаконно похитиша, и несть мира, несть ослабы, несть успокоения в домех наших, ниже во граде нашем. О, Всеведущий и Премилосердый! Ты веси беду нашу, зриши озлобления, слышиши рыдания убогих, стенания сирых и вдовиц и гласы неповинных младенцев во общенуждии страждущих. Ты пощадил еси Ниневию, град великий, беззакония исполненный, ради покаяния его и ради младенец, иже десницы своея, ни шуйцы своея не познаша. Пощади и нас грешных, умилосердися над градом нашим. Прости нас, Многомилостивый, прости нас, Долготерпеливый, прости нас, Всеблагий, помилуй, пощади ради младенец наших, сирых и вдовиц, пред Тобою, о Милосердый, слезы своя проливающих. Тебе вся возможна суть, всемогущий Владыко! Якоже убо единым словом Твоим не точию слепыя, глухия и немыя исцеляеши, но и мертвых воскрешаеши. Тако возглаголи и ныне всесильным словом Твоим в сердцах безбожных людей, иже святотатство содеяша, просвети разум их,  беззаконием омраченный, пробуди совесть их суетными мудрованьми и страстьми пагубными усыпленную, обрати волю их ко исполнению животворящих Твоих заповедей, да и тии познают, коль сладка суть словеса Твоя сердцу человеческому, и коль благо иго Твое и бремя Твое легко есть. Да прославится убо имя Твое, Господи Спасителю наш, и в сих погибающих братиях наших, иже святотатство сотвориша и да посрамится лукавый супостат наш диавол, сеяй плевелы на ниве Твоей, яже есть Церковь Твоя святая!

      О, Господи Боже милосердый, Боже премудрый, Боже всемогущий! Паки и паки припадаем Тебе и слезно в покаянии и умилении сердца вопием: согрешихом, беззаконовахом, неправдовахом пред Тобою, и воистину праведно по делом нашим наказуеми есмы. Помяни убо веру и смирение отец наших, услыши теплая моления преподобных старцев Глинских и всех святых земли нашея. Помилуй землю Сумскую и сотвори убо, да возвратится похищенный нечестивыми чудотворный образ Корсунский Пречистыя Владычицы нашея Богородицы, да возрадуются вновь  сердца наша зрением дивнаго лика Небесныя Царицы, да якоже древле, тако и ныне на земли нашей, и в нас, и чрез нас прославится всесвятое имя Твое, Отца и Сына и Святаго Духа, ныне и присно и во веки веков. Аминь.

 

Анонсы

Фотоальбомы